د زرو قدر زرګر پېژني
د وطن سره مینه،محبت او عشق یوه طبیعي آرمان دی چې الله تعالی د خپلو مخلوقاتو په منځ کې داسې ځای کړی چې حتی حیوانات هم د خپل ژوند ځای ته متوجه وي.
د اسلام له نظره وطن پالنه باید له افراط او تفریط نه ډک اړخ ونلري چې د تبعیض لامل شي او د مختلفو قومونو تر نامه لاندې خلک له یو بل څخه جلا او ددوی ترمنځ د دښمنۍ، نفرت او نفاق سبب وګرځي.
د لوی څښتن مهرباني ده چې په دې سختو شرائطو او حالاتو کې اوس هم د کار او دستار خلک لرو چې د هېواد د پرمختګ او روښانه راتلونکي لپاره کار کوي د مثال په ډول د یو څو کسانو نومونه اخلم لکه حاجي زراب، حاجي الکوزی او میرویس عزیزي.
د سوداګرۍ او پرمختګ په برخه کې دوی ډېرې هلې ځلې کړي او د ګران هېواد نوم یې روښانه ساتلی.
سره له دې چې دوی هم ستونزې او مشکلات لري خو د خاینو، پاټکیانو، مفسدینو او وطن فروشانو څخه یې سپی هم ښه دی.
بدبختانه افغانان یو عادت لري چې خپل خلک په کاڼو وهي مګر پردي درواغجنو او لوټمارانو سوداګرو ته خوشحاله وي.
د عزیزي ګروپ مشر چې کومې وعدې د هېواد د پرمختګ او آبادۍ لپاره کړي قابل د قدر او تقدیر دي.
ځینې خلک ګورم چې په شعوري ډول د عزیزي سپکاوی او بې عزتي کوي.
مونږ او تاسې باید د عزیزي دومره ستاینه وکړو که خدای مه دا وعدې یې احساساتي کړي هم وي د ولس مینه یې دېته مجبور کړي چې په عمل کې ثابت کړي .
راځئ پرته له هر ډول تبعیض څخه خپل با احساسه سوداګر تشویق کړو تر څو د هېواد په آبادۍ کې د زړه له اخلاصه ونډه واخلي .
ارواښاد استاد یقین یوسفزي څه ښه ویلي دي
د وطن مینه یې چې نه وي په مغزو کې
داسې سر نه کدو ښه دی په پټو کې
چې تاریخ د پلار نیکه یې ورنه هېر وي
کوڅه ډب دی خوشې ګرځي په کوڅو کې