سیاست د انساني ټولنې یوه ډېره مهمه برخه ده

په عمومي ډول د ملت رهبري کول، د هغوی په خوښه د حکومت جوړول، حکومت په ښه توګه اداره کول او په اجتماعي،فرهنګي او اقتصادي چارو کې ملت ته لارښوونه کول سیاست بلل کیږي.

وړ او صادقه رهبري د حکومت اساسي اړتیا او د اقتصادي سوکالۍ تضمین دی.

دوه درې کلن حکومتونه او نیمګړې پروژې یواځې بدمرغي راوړي نه خوشحالي.

سیاست، فرهنګ، اجتماعي عدالت، تعلیم، ادب او هنر د یوې ټولنې اساسي ستنې دي.

یو ښه سیاسي سیسټم د ملي ارزښتونو مثبت فکر په تحقق کې مهم رول لوبوي.

خود غرضي، حرص،عدم برداشت او بې عدالتي د ټولنې د تباهۍ سبب ګرځي.

په کومه ټولنه کې چې سیاسي رهبري د علم، عقل او سیاسي بصیرت په بنیاد نه وي راتلونکي نسلونه به وده ونه کړي.

تعلیمي وروسته والی د هېواد د اوسنیو ستونزو په سر کې ځای لري، دا یو حقیقت دی چې ښوونه او روزنه د ملتونو په عروج او زوال کې اساسي رول لري.

زموږ لپاره اړینه ده چې د تعلیمي وروسته والي د لرې کولو لپاره اوچت ګامونه پورته کړو.

د روغتیا، سپورت، تعلیم، نصاب، ساینس او ​​​​ټکنالوژي، انفلاسیون، داخلي او بهرنۍ پالیسۍ، اقتصاد، ټولنه، انرژي، کرنه، اوبه او داسې نورو ملي پروژو د موضوع په اړه مثبت بحث او خبرې وشي ترڅو ځوان نسل د عصري علومو زده کړې ته لېواله شي.

له عصري علومو څخه د ګټې اخیستنې لپاره باید د علم په ټولو برخو کې څېړنې ته پوره پاملرنه وشي.

همدا ډول په اقتصادي، سیاسي او اداري چارو کې اصلاحات راوستل د ننني عصر اړتیا ده.

اقتصاد د عصري وخت تر ټولو لوی حقیقت دی.

یو پیاوړی اقتصاد د ژوند په ټولو برخو کې مهم رول لوبوي.

د اقتصادي ثبات لپاره د سیاسي قوتونو همکاري خورا مهمه ده.

همدغه راز په هېواد کې د امنيتي فشارونو څخه د وتلو لپاره، د نا قانونه وسلو او نشه ئي توکو د قاچاق د کنټرول لپاره د پولو د مديريت اغېزمن سيسټم رامنځته کول اړين دي، دا به زموږ د راتلونکو نسلونو لپاره د خوندي راتلونکي په یقیني کولو کې مرسته وکړي.

د وسلو او نشه يي توکو کاروبار او ورسره تړلي کسان په افغانستان کې یوه لویه انساني غمیزه ده.

دلته نسلونه تباه شول، ډېر ځوانان په دې سوداګرۍ کې ښکیل شول.

د یوې سالمې ټولنې د جوړولو لپاره اړینه ده چې ځوانان د اعتیاد له شر څخه وساتل، تر څو وکړی شي په ټولنیز پرمختګ کې خپل بشپړ رول ادأ کړي.

له هر ډول بحرانونو څخه د هېواد د راویستلو لپاره د عامه افکارو له اهمیت څخه انکار نه شي کیدی.

همدا ډول په ملي پلان جوړونه کې د خلکو ونډه هم ډېره مهمه ده، خلکو ته باید د ملي پلان جوړونې او تصمیم نیولو کې اغېزمن رول ورکړل شي چې یواځې د محلي چارواکو له لارې ممکن دی.

د ملت په اراده جوړ شوی نظام په هر هېواد کې د وخت اړتیا ده چې د ملت په خوښه یو موثر سیستم معرفي شي تر څو د نظام د ټینګښت لپاره د خلکو باور ټینګ او د هېواد په ابادۍ او ثبات کې خپل رول ولوبوي.